صقع * صقع شتاوي - مفتاح احواس

الشتاي/ مفتاح احواس
مفتاح فرج محمد احواس 1986 ف منطقة قمينس

ما يحسابوا كبدي ذابت* ديما لولاف البل عابت
ساكت ودموعي افضحني* نين طريتك عصبًا عني
كان تعدّ الحنّ ظليمة *يا القديم اظلمني ديما
ساكت ما تسمع لي دوَّة *والدنيا منقلبة جوَّا
هم غني فارق عن همِّي * مشٍّيت دموع في كمي
غني عنده نقناق طويل * وعازة ومزاقات عويل
عزيز بعد طيِّب ممشاك * كسر عود الشظ وخلاَّك
ماني يا القديم نصيبك * نين انعديلك وانجيبك
ماني يا القديم مقامك* تنشل بي عقاب أيامك
بكينا عَ الجرح اللِّي فات *الدوَّة في بكية لخرات
لاقط عَ الغالي هجَّاوة* عقلي من جوَّا يدِّاوا
لاقط جرَّة ونسهريلك * نين يتوق عليٍّ رحيلك
اللي جن دون اولاف الدار* ايجن بالعين بيوت كبار
قعدت نقول العذر معاك* مغير تعال وجيب دواك
تقول خذا ريقي ع المر *هذي شر هذي شر وشر
اتصدَّق مو عارفني من * عزيز بعد هاضاك الحن
أيَّام ونا ننفض في ايديِّ * عزيز يريد يموت عليِّ
عقلي فيه مرض متماضي *ما جا للبكية من فاضي
جاب الليل نصيب دسايس *من صبح الله ونا حايس
اكره ما يكره جيِّ الليل *العقل اللي ما عنده حيل
نخافوا عَ الولاف تخيل * اللي جاب علل راه يشيل
يانا يا عقلي نجرولك *بالك كيف اقدم نلقولك
كانوا لولاف وكنتلهم * واليوم غنايا وبهلهم
العين إن قلت لها عَ الحق* تقول خطا لولاف ودق
في دمعك ماعاد نسالك* غير الله الله في حالك
عمرك ودموعك ودَّرتي * واندمتي نين تكسرتي
يا القديم قريت عيونك * مليانات نريد نهونك
اللي أوجعتني بيت غلاي *كربته مِ الرمة جا جاي
فكَّاك الجازل مِ الرمَّة *طرطش يا مولاي ملمَّه
ايش انديرولك بختك هكّ *الرمة مِ الجازل تنفكّ
لو تعرف يا ياس تعبها * ما ترخي رمَّة كاربها
ماح الكم وزق الجابر* قيس اقدم فاهقهم كابر
غالي زقَّت كبدي منَّه *يوم جروح ويوم محنَّة
نلقى يا القديم بدالك *سلَّم عقلك كان حكالك
تهون غلاي تهون عليٍّ * هذي ما ظني فيها شي
خربت بين عزيز وبيني* كان تعزِّيني عزيني
غلا عاش ملاقات عيون* ومات علي قولة مرهون
غير عطي لله حكامك* واللي تقسم لك قدَّامك
العقل اللي يقدر ينساك *خذيته يا القديم معاك
مرة مرهون مخليها *ما نزمط ريق الا بيها
الخاطر طايح في مرسال *اعمد لولاف تعال تعال

و اللي عنده ايزيد